ဂျာမဏီမြေပေါ်က ခြေလှမ်းများ- ၁၁

မာဃ ပူဇာ
အပိုင်း( က )

ဖေဖ၀ါရီ ( ၂၈ ) တပေါင်းလပြည့်ကျော် ( ၁) ရက် နေ့ မှာ မာဃ ပူဇာ ဆိုပြီး ပွဲတော် အသေးစား ကျင်းပ ခဲ့ပါတယ်။ ကြေငြာထားတဲ့ အစီစဉ်တိုင်းပါပဲ။

မနက် (၁၀) မှာ လူများက ကျောင်းကို လာကြပါတယ်။၁၀ နာရီခွဲ မှာ ဘုရား ၀တ်ပြု သြ၀ါဒ ပါတိ မောက် ၃ ဂါထာကို (၃)ခေါက်ရွတ် ဖတ် ပူဇော်ပါတယ်။ ပါဠိလို သုံးခေါက်၊ ဂျာမန်လို သုံးခေါက်ပါ။ ၁၁နာရီ၂၀ မှာ သံဃဒါန ဆွမ်းကပ် လှူကြပါတယ်။ ၁၂နာရီမှာ လူများ စားခန်း သောက်ခန်း ပြုလုပ်ကြပါတယ်။

နေ့ လည် ၁ နာရီ မှာ သံဃာ နဲ့ ဆိုင်ရာ သိသင့်တဲ့ အချက်များ ကို ကိုယ်က ပြောဟောခဲ့ပါတယ်။

၂နာရီ မှာတော့ မြစ်ဘေး တောအုပ်ထဲ လမ်းလျှောက်သွားခဲ့ကြတယ်။ ဒီအစီစဉ်ကတော့ အဝေးက လာတဲ့ လူဒကာဒကာမများနဲ့  အတူ ကိုယ်နဲ့ အရှင်ဌိတဓမ္မ သွားခဲ့တယ်။ အရှင်ဂဝေသကော မှာ ကျောင်းမှာ ကျန်နေတဲ့ သူတွေကို ဧည့်ခံ ဓမ္မစကား ပြောကြားနေခဲ့တယ်။ ညနေ ၄နာရီခွဲ မှာ ထိုင်း ဒကာဒကာမတို့  စုပေါင်းဒါန ပြုလုပ်ကြပါတယ်။

ညနေ ၅ နာရီမှာ အရှင်ဂဝေသကော က သူဓာတ် ပုံ ရိုက် မှတ်တမ်းထားတဲ့ ထိုင်း နဲ့  မလေးရှား ဓာတ်ပုံများကို ရှင်းလင်းပြောကြားတယ်။ ည ၇ နာ ရီ မှ ၈ နာရီ ၄၅ မိနစ်ထိ ဘုရားဝတ်ပြု တရားထိုင် ပါတယ်။ ည ၉ နာရီမှာ ပါရိသုဒ္ဓိ ဥပုသ်ပြုပါတယ်။
အစီစဉ်ကို မသိသေးသူတို့ အတွက် ထပ်မံ ဖေါ် ပြပေးလိုက်တာပါ။

အကျယ်ကား ဒီလိုပါဗျာ-

မာဃ ပူဇာ ဆိုတာ မြန်မာမှာ တပိုတွဲ လပြည့်နေ့  သတ်မှတ်ထားတဲ့ သြ၀ါဒ ပါတိမောက်နေ့ ပါ။ မာဃ=တပို့တွဲ လ ပါ။ ဒါပေမယ့် မြန်မာတို့  အသိများတာက အစားသောက်ဖြစ်တဲ့ တပိုတွဲ ထမင်းနဲ ပွဲ ဆိုတာ ထင်ရှားတာပါ။ တိုက်တိုက်ဆိုင်ဆိုင် မြန်မာဒကာမပေါ့။ တပိုတွဲ လပြည့်နေ့ က ထမင်းနဲ ဘုဉ်းပေးရပြီ လို့  ကိုယ်က ထင်ခဲ့တာ။ လာပို့ မယ် ပြောပြီးမှ ထမင်းနဲက အုန်းသီးမရှိလို့ တဲ့။( တွတ်ပီ - ဖြစ်သွားတယ်။)အဲဒီလပြည့်နေ့  ရိုးရိုးဆွမ်းပဲ လာပို့တယ်။

ကဲ ကြည့်အုံး။ ဖြစ်ပုံက- တပေါင်းလပြည့်မှ ထမင်းနဲ ယူလာတယ်။ လာလှူတယ်ပေါ့။ ခု - သူလာလှူတာက မြန်မာလို တပေါင်းလပြည့်နေ့ မှာ လှူတယ်ပေါ့။ တော်သေးတယ် အုန်းသီး ရသွား လို့ ။ မြန်မာ အလွမ်းပြေပေါ့လေဆိုပြီး ပြောပြောဆို လာကပ် လှူရှာတယ်။(သာဓုပါဗျာ။)

ဒီမှာတော့ မာဃ ပူဇာ ကျင်းပတာ မြန်မာလို တပေါင်းလပြည့်ကျော်(၁)ရက်နေ့ ပါ။

မနက်ခင်းမှာ ဘုရားဝတ်ပြုပြီး ခဏမှာ ကျောင်းအနီးဝန်းကျင် လမ်းအတိုင်း ကျောင်းကို လက်ယာရစ် သုံးခေါက်ပတ်လျှောက်ပြီး ဘုရားဂုဏ်တော် တစ်ပါတ်၊တရားဂုဏ်တစ်ပါတ်၊ သံဃာ့ဂုဏ်တော် တစ်ပတ် စီ အဆက်မပြတ် ရွတ်ဖတ်ပါတယ်။ လက်ထဲမှာ တော့ နံ့ သာ အမွှေးတိုင်၊ ပန်းစီး၊ ဖယောင်း တိုင် ဘုန်းကြီးများက ရှေ့ က ဦးဆောင်လျက် လူများနောက်ကလိုက်ပြီး အသံထွက် ဂုဏ်တော် ပွါးဖြစ်ခဲ့ကြတယ်။

လာရောက်ကြတဲ့ လူတွေကတော့ မြူးနစ်မြို့  ကိုယ်တရားဟောသွားတဲ့ အသင်းက ဂျာမန် အသင်း သူ အသင်း သားများ၊ ပြီးတော့ ထိုင်း လူမျိုးများပေါ့။ ထိုင်းလူမျိုးက များပါတယ် ။

အဲဒီ နောက် အရှင်ဂဝေသကော က ထိုင်း ကျောင်းသား ကျောင်းသူ လေးများကို ၅ ပါးသီလ ပေး တယ်။ ဒီပူဇာနဲ့  ပါတ်သက်ပြီး ပဉ္စ၀ဂ္ဂီ (၅)ပါး ပါတဲ့ ဗုဒ္ဓရုပ်ပုံ ကားချပ် ကိုင်ပြီး ရှင်းပြတယ်။ ပြီးတော့ ဆွမ်း ကပ် ၊ ဆွမ်းဘုဉ်းပေးတယ်ပေါ့။ ဘုန်းကြီးများ ဘုဉ်းပေးပြီး လူတွေ တစ်ခါတည်း စားကြတယ်။

ပြီးမှ သံဃ အကြောင်းရာကို ပါဠိတော်များ နဲ့ အတူ ကိုယ်ဖြတ်သန်းခဲ့တဲ့ အတွေ့ ကြုံတွေကို ကိုယ်က ရှင်းပြခဲ့တယ်။ ပြောပြခဲ့တယ်။

( အဲဒါကိုအပိုင်း(ခ) ဖေါ်ပြပါမယ်။ အပ္ပမာဒ မဂ္ဂဇင်းမှာ ဆောင်းပါးများစွာ ရေးတဲ့ သူငယ်ချင်းက ကိုယ့်ကို သတိပေးပါတယ် ။ တစ်ခါတည်း ဆောင်းပါးရှည်ဆို စာဖတ်သူတို့  ညီးငွေ့ မယ် ၊ အပိုင်းခွဲ သင့်ကြောင်း အကြံကောင်းများ ပြုထားတာမို့ ပါ။)

ကိုယ် သံဃအကြောင်းရာ ရှင်းပြီးတဲ့နောက် မြူးနစ် အသင်းက လူများနဲ့ အညောင်းပြေဖျောက် လမ်းလျှောက်ဖြစ်ခဲ့တယ် ။ တရား ရေးရာလည်း လမ်းလျှောက်ရင်း မေးတာနဲ့  ပြောဖြစ်တယ်ပေါ့။
အပြန်မှာ ထိုင်းဒကာတို့  အလှူမပြုလုပ်ခင် ကိုယ်က သီလပေးပြီး၊ အရှင်ဂဝေသကော က ရေစက် ချပေါ့။

ပြီးမှ အရှင်ဂသေကော က သူ့ ရဲ့  အစီစဉ် အတိုင်း လက်ပတော့ နဲ့  သူမှတ်တမ်းတင် ရိုက်ခဲ့တဲ့ ဓာတ်ပုံ တွေ ကိုရှင်းလင်းပြတယ်။
ဟို လွန်ခဲ့တဲ့ ၁၆နှစ်ဆီက ရုပ်ရှင် (၇၅) နှစ် စိန်ရတုကိုတောင် အမှတ်ရသွား စေခဲ့တယ်။ ရုပ်ရှင်ပေါ်ကာစ ဆိုင်း မပါ စကားပြော အသံမပါ၊ အောက်ကနေ ဆိုင်းတီးပြီး ပိတ်ကားပေါ်က ဖြူမဲ ကို သရုပ်ဆောင်တာ ကြည့်ပြီး ရှင်းပြနေသလိုပါလား ပေါ့။

ခုဟာက တီးလုံးမပါဘဲ သက်သက် ဗလာချည်း ရှင်းပြနေတယ်။ သူရှင်းပြတာကတော့ သံဃာနဲ့  ဆိုင်တဲ့တရားအားထုတ်တဲ့ နေရာတွေ၊ အနောက်က ရဟန်းတော်များ အကြောင်း၊ မလေးရှား သံဃာ တွေအကြောင်း၊ကျောင်းတည်နေပုံ စင်္ကြံလမ်းနဲ့  ။ ထိုင်းကလူတွေ၊ မလေးရှားက တရုပ်တွေ တရား ထိုင်ကြတာကို ဒီက လူတွေ အားကျလာအောင် ပြောတာ ထင်လေရဲ့ ။

( ပွင့်လင်းစွာ ၀န်ခံရသော် ဂျာမန်လို ရှင်းပြသည့်အတွက် အားလုံးနားမလည်။ နားလည်သလောက် ပြောလိုက်တာပါ။ဒါ့ထက် ဘာတွေ ပြောသေးတယ်ဆိုတာတော့ မသိတော့ပါ။)

ဒီလိုနဲ့  တစ်နေကုန်သွားတာပါပဲ။ လူတွေလည်း ပင်ပန်းကြရောပေါ့။ လူကလည်း များသလားမမေးနဲ့ ကျောင်း နဲ့  အပြည့်လျှံပါပဲ။ ကျောင်းက ဆန့် တာလည်း လူ ၃၀ ညပ်ညပ်စာသာ။ လာကြတာတော့ လူ ၇၀ ခန့်  လောက်ထိ လာပါတယ်။ မနက်ခင်း ပူဇာ အပြီး ကျောင်းသားနဲ့  အဖွဲ့ များ ပြန်သွားလို့  နေသာ ထိုင်သာပါ။ နေ့ လည်မှာ တစ်ချို့ ကတော့ မိုးတိုး မတ်တပ် ရပ်လျက် နေရတာကလည်း ရှိပါ သေး တယ်။

တစ်နေတာ ပြီးသွားတာမို့  လူတွေ လည်း ပြန်သွားကြလေပြီ။ ည ဘုရားဝတ်ပြုချိန် တရားထိုင်ချိန်မှ အချို့  ပြန်လာကြတယ်။ကျန်တဲ့ အပိုင်းကိုတော့-

မာဃ ပူဇာ အပိုင်း (ခ) ကို စောင့်စား ရှုစားပါလေကုန်။

မှတ်သားလိုသူတို့ အတွက်

တစ်ဆယ့်နှစ်လ အမည် ပါဠိ-
စိတ္တ မာသ- တန်ခူးလ ။ ဝေသာခ မာသ- ကဆုန်လ။ ဇေဋ္ဌ မာသ- နယုန်လ ။ အာသာဠှ မာသ- ၀ါဆိုလ။ သာဝန မာသ- ၀ါခေါင်လ ။ ပေါဋ္ဌပါဒ မာသ- တော်သလင်းလ။ အဿယုဇ မာသ- သီတင်းကျွတ်လ။ကတ္တိက မာသ- တန်ဆောင်မုန်းလ။ မာဂသိရ မာသ- နတ္တော်လ ။ ဖုဿ မာသ- ပြာသိုလ် လ။ မာဃ မာသ- တပိုတွဲလ ။ ဖဂ္ဂုန မာသ- တပေါင်းလ။

မြတ်ရောင်နီ
(၂၈၊၀၂၊၂၀၁၀)