ဘ၀ဆိုတာ ဒီလိုပါပဲ

ဘ၀ဆိုတာ ဒီလိုပါပဲ

ဒကာမ တစ်ယောက်က သူရဲ့  ခင်ပွန်း မတော်တဆ ချော်လဲတာနဲ့ ဆေးခန်းသွားပြရတယ်။ ဆေးခန်း သွားပြခဲ့ပေမယ့် ဆေးခန်းက ကလည်း ငွေသာ ယူလိုက်တာ ဟိုဟာအကြောင်းပြ ဒီဟာ အကြောင်း ပြနဲ့  အဆင် မပြေဘဲ ပြန်လာရတယ်။လက်ကတော့ မသက်သာသေး။

ငွေကတော့ ဘာဆေးမှ မပေး၊ ပတ်တီးလည်း မစည်းပဲနဲ့ ကို ကုန်သွားတာကလည်း မနည်းပါလား။ ဈေးက ခေါင်ခိုက်နေတယ်။ လူတိုင်းကတော့ ဖြစ်လာတဲ့ ရောဂါကို အမြန်ပျောက်ချင်တာပေါ့လေ။

ကိုယ်ကလည်း ဒီအကြောင်းကို သိတာနဲ့  လူနာ မေးလိုက်တာ။ ဘယ်လိုလဲ ဒကာ သက်သာရဲ့ လားပေါ့ ။

အဲလို မေးလိုက်တာနဲ့ ပဲ သူက ကိစ္စများမြောင် လူတို့ ဘောင် ၊ တအား စိတ်ပင်ပန်း ဆင်း၇ဲ လိုက်တာ။ သူလည်း တော်တော် စိတ်ပင်ပန်းနေတယ်၊ ဘ၀လေ..ဒါဘဲပေါ့... စသဖြင့်ရေးပြီး လျှောက် ထားလာပါတယ်။ ( စာကတော့ ရှည်နေတာမို့  မဖေါ်ပြတော့ပါ)။

ဘုန်းကြီးဆိုတာ အပြင်ပဖြစ်တဲ့ ရောဂါကို ဆေးကုလို့  မရပါဘူး၊ မအပ်စပ်ပါဘူး ၊ အတွင်းက နာနေ တဲ့ စိတ်ကိုတော့ ဘုရားသားတော် ပီပီ ကုပေးလို့ ရပါတယ်။ ဆေးကုကောင်းပါတယ်။

မြတ်စွာဘုရားကိုယ်တော်တိုင်ကပင် ဘဂ၀ါ အမည်ရ ဆေးဆရာ မည်တော်မူပါပေတယ်။ ဘဂ၀ါ ဟာ ဘုန်းရှိတော်မူသော လို့  ဘာသာပြန်နိုင်သလို ဆေးဆရာမည်တော်မူသော လို့  ဘာသာပြန်လိုက ပြန်နိုင်ပါတယ်။ ( ဂရမ်မာဆရာတို့  ကြံဆသည့် နည်းပါ။)

သောက ဖြစ်နေသူကို သောက မဖြစ်အောင်၊ ငိုကြွေးနေရသူ မငိုကြွေးရအောင် ၊ စိတ်ဆင်းရဲသူ စိတ် မဆင်းရဲအောင် တရားရေအေး အမြိုက်ဆေးကို တိုက်ကျွေးတော်မူခဲ့သည် မဟုတ်ပါလား။

ဒကာမရဲ့  စိတ်ဆင်းရဲနေတဲ့ စိတ်ကို နဲနဲလေးမှ သက်သာ သက်သာဆိုပြီး စာလေးနဲ့ အတူ ကိုယ်ချင်း စာပြီး စိတ်ကို ဒီလိုလေး ကုသခဲ့ပါတယ်။ သက်သာစေရောပေါ့။

ဒကာမ ရေ

ဘ၀ဆိုတာ ဒီလိုပါပဲ။

ကိစ္စများများမြောင် လူတို့ ဘောင် ဆိုဆို
ဒုက္ခများမြောင် လူတို့ ဘောင်ဆိုဆို ဆိုရပါမယ်။

လူရော ဘုန်းကြီးပါ အတူတူပါပဲ။
ဒုက္ခနယ်ပယ်မှာ ဒုက္ခက ရှိတတ်စမြဲပါ။

သဗ္ဗေ သင်္ခါရာ - အားလုံးဟာ သင်္ခါရ ချည်းပါပဲ။
သင်္ခါရ ဆိုတဲ့ဟာက အမြဲ ပြောင်းလဲနေတာကိုး။

လူရယ်လို့  ဖြစ်လာရင် ကြုံတွေ့ ရစတတ်မြဲပါ။
တစ်ခု မဟုတ် တစ်ခုကိုပေါ့။
အကောင်းတွေ့ လိုက် အဆိုးတွေ့ လိုက် တွေ့ မှာပါပဲ။

အကောင်းတွေ့ တွေ့  အဆိုးတွေ့ တွေ့ 
ခံနိုင်ရည်ရှိအောင် ကြိုးစားရပါမယ်။

အကောင်းတွေ့ တိုင်းလည်း တအား ၀မ်းသာစရာ မလိုသလို
အဆိုးကြုံတော့လည်း တအား ၀မ်းနည်းစရာ စိတ်ညစ်စရာ မလိုပါဘူး။

ဒီိလိုဆိုတော့ သင်္ခါရ ဆိုတာ ပြောင်းလဲ နေတာမို့ 
ပြုပြင်လို့ ရတဲ့ သင်္ခါရ ကို ပြုပြင် ပြောင်းလဲလို့ ရနိုင်ပါတယ်။

ခု လက်ကျိုးသလား မကျိုးသလား မသိသေးပေမယ့်
ဆရာဝန်ကောင်းကို တွေ့ အောင်ရှာပြီး ကုရင် ဖြစ်နိုင်ပါတယ်။

သင်္ခါရ ပေပဲကိုး။ ပြုပြင်လိုက်ပေါ့။ ကောင်းသွားမှာပါ။
မြန်မြန်ကောင်းပါစေလို့ လည်း မေတ္တာပို့ သပါတယ်။

ငွေဆိုတာကတော့ သုံးနိုင်ဖို့  ရှာထားတာဆိုတော့
လိုအပ်တဲ့နေရာ သုံးကြရမှာပဲလေ။
ဖြုန်းတာမှ မဟုတ်ဘဲ။ ရဲရဲကြီး သုံးလိုက်ပါ။

ကျားကြီး ခြေရာကြီးတဲ့။
နိုင်ငံတွေက ကြီးတော့ ကုန်ကျစရိတ်ကလည်း
ဘယ်သေးပါ့မလဲ။ ကျားက ကြီးတာကိုးဗျ။

စိတ်ညစ် မနေနဲ့ နော်။
စိတ်ညစ်တာက လူကိုပါ ထိခိုက်စေပါတယ်။
စိတ်ညစ်မှုက ကိုယ့်ကို ညှင်းဆဲတာပါ။
စိတ်ညစ်ရင် နှစ်ခါနာတာပေါ့။
ကိုယ်ရော စိတ်ရော နာတယ်။

စိတ်ကို အေးအေးဆေးဆေးလေး
ထားနိုင်အောင် နဲနဲလေး ညိမ်အောင်လုပ်ပေးပါ။
ညိမ်ဖို့ ကတော့ တရားထိုင်ပေါ့နော်။
ဒါဆို စိတ်ချမ်းသာမယ်။ ဖြေရှင်းမှုကို အေးဆေးစွာ
ကောင်းကောင်းကြီး ရသွားပါလိမ့်မယ်။


အားလုံး အစစအရာရာ
အဆင်ပြေပါစေဗျာ
မေတ္တာဖြင့်
ဘုန်းဘုန်း

မှတ်ချက်။ ။ ခုလောလောဆယ် ဂျာမန် သင်တန်း မရှိသေးပါ။ သင်တန်း နေ့ စဉ် အပြေးလွှား သွား နေတုန်းက အတော်လေး ဆောင်းပါးကို သီးသန့် ရေးဖြစ်သေးတယ်။ ခု ဆောင်းပါး သီးသန့်  ရေးဖို့  စိတ်က မလာသေးလို့  စိတ်လာတဲ့ ပြန်စာလေးတွေကို ဆောင်းပါးအနေ ရေးတင်လိုက်ပါတယ်။

မြတ်ရောင်နီ
( ၀၄၊ ၀၈ ၊ ၂၀၁၀ )