အဂါရသ္မာ - အနဂါရိယံ
အိမ်ယာတည်ထောင် လူ့ ဘောင်မှသည် အိမ်ယာ မထောင် ရဟန်းဘောင်သစ်ဆီသို့ 
အိမ်ယာတည်ထောင် လူ့ ဘောင်မှသည် အိမ်ယာ မထောင် ရဟန်းဘောင်သစ်ဆီသို့ 
ဒီစကားလေးက ဘုန်းကြီးတော်တော်များများ ပြောကြတယ်။ ဘုန်းကြီး တော်တော်များလည်း ဟောလေ့ ဟောထ ဖြစ်တဲ့ ရဋ္ဌပါလသုတ္တန် ကို နာဘူးကြပါလိမ့်မယ်။ ဒီပါဠိကရင်နီးနေလောက်ပါပီ။ ဒီသုတ္တန်ကို နာမည်ကြီး ဓမ္မ ကထိက မှ မဟုတ်ပါ။ တောတော ရွာရွာ ဘုန်းကြီးများမဖြစ်မနေ အလွတ်ရ ထားရတဲ့ သုတ္တန်ပါ။ မဖြစ်မနေလို ဆိုလိုက်တာကလည်း ရှင်ပြုပွဲ၊ ရဟန်းခံပွဲ ဆိုရင် သာသနာရဲ့ အထက်တန်းကျပုံ။ မြင့်မြတ်ပုံ နဲ့ သာသနာ ရဟန်း တစ်ပါး ဖြစ်ဖို့  မိဘများကို (၇)ရက်ဆက်တိုက် အစာငတ်ခံ ဆန္ဒပြပြီး ရဟန်းပြုခဲ့သူ အကြောင်းပေါ့။ ဒီလောက် အစဖေါ်ပေး ရပြီ။ လုံလောက်ပြီ။
ဘာပြုလို့ သာသနာကို ဟိုရှေးရှေးက စပြီး ယခုထက်တိုင် သဘောပေါက်သူတို့  မြတ်နိုးတန်ဘိုး ထားကြသလဲ။ တကယ်မြင့်မြတ်လို့ ပဲ လို့  အဖြေကို တိုတိုတုတ်တုတ် ထိထိမိမိ နဲ့  ဖြေလိုက်ပါရစေ။
ခုလို ရေးလိုက်တာ အဂါရသ္မာ နဲ့  အနဂါရိယံ ဆိုတဲ့ စကားလုံးလေးကို စေ့စေ့ စပ်စပ် လိုက်စဉ်းစားမိ ခဲ့လို့ ပါ ဘဲ။ မြန်မာက ဘာသာပြန်တာ တွေးကြည့် အိမ်ထောင်မယ်။ ယာထောင်မယ်။ ဒါက လူ့ ဘောင်ရဲ့  အလုပ်ပါ။
ယာထောင် ဆိုတဲ့ စကားကတော့ တောသူတောင်သား ကို ဦးစားပေးပြီး ဘာသာပြန်ကြတာပါ။ မြို့ နေ လူတန်းစားတို့  ယာထောင်ဖို့  စိတ်ကို ကူးမိမယ် မထင်မိဘူး ။ ယာလုပ်တာကိုလည်း သူတို့  စိတ်ဝင်စားမှာ မဟုတ်။ လုပ်လည်း လုပ်နိုင်ဖို့ မလွယ်။ မြို့ မှာလို နေရိပ်ထဲ မဟုတ်တာကိုး။
ယာထောင် ဆိုတဲ့ စကားကတော့ တောသူတောင်သား ကို ဦးစားပေးပြီး ဘာသာပြန်ကြတာပါ။ မြို့ နေ လူတန်းစားတို့  ယာထောင်ဖို့  စိတ်ကို ကူးမိမယ် မထင်မိဘူး ။ ယာလုပ်တာကိုလည်း သူတို့  စိတ်ဝင်စားမှာ မဟုတ်။ လုပ်လည်း လုပ်နိုင်ဖို့ မလွယ်။ မြို့ မှာလို နေရိပ်ထဲ မဟုတ်တာကိုး။
ပြီးတော့ ဘုရားကလည်း တောမှာ မွေးဖွား၊ တောမှာ ဘုရားဖြစ်။ တောမှာ တရားဦးဟော။တောမှာ ပရိနိဗ္ဗာန် ပြုတယ်။ တောမှာနေတဲ့ ရဟန်းကို အထူးတလည် ခြိးမွမ်းထားတာ တွေ့ ရတယ်။ ဒါကြောင့်မြန်မာဆရာတော် များကလည်း အဋ္ဌကထာ အဖွင့်များနဲ့  အညီ အိမ်ထောင်၊ ယာထောင် ဆိုတာကို အိမ်ယာတည်ထောင် လို့  တွဲသုံးတာ ဖြစ်လောက်ရဲ့ ။
အိမ်ထောင် မှ အိမ်အရောင် တက်စေဖို့ -
အိမ်ထောင် လို့ ဆိုတာမှာလည်း အိမ်ကို အသစ်ထူထောင်တာတာ ဖြစ်နိုင်သလို ၊ အိမ်ထောင်ကျခြင်း လို့ လည်း အဓိပ္ပါယ် ယူမည် ထင်ပါတယ်။ အိမ်ကို အသစ်ထူတာကလည်း အကုန်ကျ မသေး။ ထူထောင်နေသူများကို ရှင်းပြဖွယ်လိုမည်မထင်။ အိမ်ထောင်ကျခြင်း ဆိုတဲ့ စကားလုံးကလည်း ကိုယ့်အတွက် စိတ်ဝင်စားသွားတယ်။ အိမ်ထောင်ကျတာတဲ့။ စဉ်းစားစရာ။ လင်မယားဖြစ် သွားတယ် ။ ဘာလို့  ထောင်ကျသွားတယ်လို့ သုံးတာလဲ။ အလုပ်တွေ ပိုရှုပ်သွားလို့ လေလား၊ သားရေး သမီးရေး တွေ ပိုလာမယ် ဆိုတော့။ ဟုတ်တော့လဲ ဟုတ်သား။ လောကီလူသားပဲ။ မညားကြဘဲ ကိုယ့်ဖာသာ ဒီတိုင်း လူပျိုကြီး အပျိုကြီးသာ နေကြည့်စမ်းပါလား၊ ခုလို ကမ္ဘာမှာ လူဦးရေ တိုးစရာ အကြောင်းကို မရှိဘူး။
ဒီလို လည်း ထင်ပါရဲ့ ။ဗုဒ္ဓဘာသာ ရှုထောင့်ကနေပြီး ရှေးရှေးသူတော်ကောင်းတို့ က အိမ်ကိုထောင်သဖွယ်မြင်မှ လွတ်မြောက်အောင် ကြိုးစားကြစေဖို့  ပြောခဲ့ ဆိုခဲ့လေသလား။ စာတစ်ခုကလည်း ရှိသေးတယ်လေ။ သမ္ဗာဓော ဃရာဝါသော- လူ့ ဘောင်ဟာ ကျဉ်းမြောင်းတယ်-တဲ့။အိမ်ကျယ်ချင်ကျယ်မယ်။ ခြံပါရှိချင်ရှိမယ်။ စိတ်ရှုပ်စရာ တွေများသမို့  ကျဉ်းမြောင်းတာလို့  ဆိုရမယ်ပေါ့။ ဒီစကားနဲ့ များ ဆက်စပ်နေမလားပေါ့။ တွေးကြည့်တာပါ။
ကိုယ့်အနေနဲ့ ကတော ချစ်ကြိုက်သူ နှစ်ဦး ညားတာကို သဘောကျမိပါတယ်။ ချစ်ချစ်ခင်ခင်နဲ တစ်ယောက် လုပ်မည့် ဟာ နှစ်ယောက်အတူ အလုပ်လုပ်တော့ အလုပ်ဖြစ်တာပေါ့။ ပိုပြီး တွင်ကျယ်မှာပေ့ါ။ အင်း- နောက် တစ်ခု ပြောရရင် အဲလို မောင်တစ်ထမ်း မယ်တစ်ရွက် အဖြစ်မျိုး လက်တွဲမှုမရှိခဲ့ရင် မာတာပိတု ဥပဋ္ဌာန မင်္ဂလာ၊ ပုတ္တဒါရဿ သင်္ဂဟ မင်္ဂလာတွေ ပေါ်လာစရာ အကြောင်းမရှိ။ ဖြစ်လာမှာမဟုတ်တော့ဘူး။ ဘုရားတောင် မင်္ဂလာတရားတော်မှာ ထည့်ဟော ထားတာ မဟုတ်ပါလား။
ရွှေမြန်မာတို့  ညားခြင်း အခန်းနားကို မင်္ဂလာဆောင်တယ် ပြောထားမဟုတ်လား။ မင်္ဂလာဆိုတာ ကိုကတည်းက ကြီးပွါးခြင်း၊ တိုးတက်ခြင်း လို့  အဓိပ္ပါယ်ရတယ်။ နှစ်ယောက် ပေါင်းမိရင် တိုးတက်တော့မယ်ပေါ့။ နောက်အဓိပ္ပါယ် တစ်မျိုးက မကောင်းတာတွေ မလုပ်ဖြစ်ဖို့ ၊ ကောင်းတာ တွေလုပ်ဖြစ်ဖို့  ဆိုတာလည်း ဖွင့်ဆိုထားပါတယ်။ အဲဒါလည်း မှန်တယ်။ ကိုယ့်ဖာသာ တစ်ယောက်တည်း နေရင် မကောင်းတာလေး အသေးမွှားကိုလည်း လုပ်ဖြစ် မယ်။ မညားသေးဘူး ရည်းစားဖြစ်ပါပြီ ဆိုကတည်းက အရက်မသောက်ရဘူး၊ ဆေးမသုံးရဘူး၊အလောင်း ကစား မလုပ်ရဘူး လို့  ချစ်သူကပြောလိုက်ရင် နားထောင်ရတယ်လေ။ ရည်းစားပြောတော့ တစ်ခဏ ဆိုထားပါရောလား။
အဲ- အဲလိုဆိုတော့ ချစ်သူဘ၀တောင်မှ ချစ်သူကြောင့် မကောင်းတာ မလုပ်ဖြစ်ဘူးဆိုရင် တိုးတက်သွားတာပေါ့။ နောက်တစ်ခု ကြားဘူးသေးတယ်။ ခုခေတ် လူငယ်စာရေးဆရာ ဘုန်းကြီးတစ်ပါး ရေးထားတာ ဖတ်ဖူးရဲ့။ ကောင်မလေး က ကောင်လေးကို တရားထိုင်တဲ့၊ ဥာဏ်စဉ်နာပြီးရင် အဖြေပေးမယ်တဲ့။ ကိုင်း- ကောင်းတာ လေးတွေလည်း တရားအလုပ်ဖြစ် မသွားပေဘူးလား။ ဒါက မိန်းခလေးတွေဘက်က ကောင်လေးတွေကို တိုးတက်စေတာပေါ့။
ကောင်လေးတွေကလည်း မိန်းခလေးတွေရဲ့  အားနဲချက်တွေကို ဒီလိုဘဲ ပြင်ခိုင်းတတ်ပါတယ်။ ငါ က ဒါမကြိုက် ဘူး ဆိုရင် မိန်းခလေး ချက်ချင်း ပြင်ခိုင်းလို့ ရသွားတယ်။ မိန်းခလေးချင်း ကြိုက်သလောက် ပြော၊ နားမထောင်ပေ မယ့် သူ့ ရဲ့ ကောင်လေး မကြိုက်မှာစိုးလို့ ချက်ချင်း ပြင်ရရှာတယ်ပေါ့။ ဒီလိုနည်းနဲ့ အချင်းချင်း တိုးတက် အောင် လုပ်သွားကြတာပါ။
ဒါက အိမ်ထောင် ဆိုတဲ့ဟာကို အိမ်အရောင်တက်အောင် လုပ်တဲ့ နည်းပေါ့။အဲလို မဟုတ်ခဲ့ရင် အိမ်မှောင် မယ်နော်။ အိမ်အရောင်လင်း ရှင်းကြပါစေပေါ့။
အိမ်ယာ မထောင် ရဟန်းဘောင်-
ခု အနဂါရိယံ- အိမ်ယာမထောင် ရဟန်းဘောင် လို့  မြန်မာဘာသာပြန်ဆိုတယ်။ စာအလိုကတော့ အိမ်မရှိရာ ဖြစ်တဲ့ ရဟန်းဘ၀ လောက်ပါဘဲ ဘာသာပြန်ရမယ်။ ဒီလိုဆိုတော့ အိမ်ဆိုတာလည်း နေဖို့ ပဲ၊ ကျောင်းဆိုတာ လည်း နေဖို့ ပဲ။ နေစရာမရှိရာ ရဟန်းဘောင်လို့  မဆိုဘူး။
ရဟန်းဖြစ်ပြီးပြီးချင်း သိမ်မထွက်ခင် ဆရာဥပဇ္ဈာယ် များက မှီရာ ၄ပါးဆိုပြီး သွန်သင်ပါတယ်။ ဆွမ်း သင်္ကန်း ကျောင်း ဆေး နဲ့  ပါတ်သက်လို့ ပေါ့။ ဒီနေရာမှာ ကျောင်းနဲ့  ပါတ်သက်လို့ ပြောချင်ပါတယ်။ သစ်ပင်ရှိရင် ကျောင်းပဲ- တဲ့။ ဘုရားကိုယ်တော်တိုင် ဘုရားမဖြစ်မီ သစ်ပင်အောက်တွေ သီတင်းနေထိုင်တော်မူသွားခဲ့တာ မဟုတ်ပါလား။
ကိုယ့်ပုဉ်းကံ ရှိလို့ ၊ ပုဉ်း ကံကြီးလို့  လှုဒါန်းသူရှိရင် ကျောင်းအမျိုးမျိုး ဆောက်လုပ် လှုဒါန်း တာတွေကို လက်ခံ လို့  ရပါတယ်။ ဒီလိုဆိုတော့ ကျောင်းလို့  ဆိုတဲ့ နေရာကို အထူး ကြောင့်ကြဖွယ် မလိုတော့ဘူးပေါ့။ ဒါပေမယ့် ကိုယ့်ဖာသာ ကျောင်းဒါယကာ သီးသန့် မရှိပါပဲ ကျောင်းကြီးကြီး တည်ထောင် တာမျိုးကို ဘုရား ခွင့်မပြုပါဘူး။
ကိုယ့်ဖာသာ ကျောင်းကြီးကြီး တည်ထောင်လို့  ပြောလိုက်တာဟာ ငွေကြေးစုပြီး ကျောင်းဝယ်ခြင်း၊ အလှူခံ ကြမ်းခြင်းများကို ဆိုလိုပါတယ်။ ဒကာ ဒကာမတို့ က အလိုက်တသိ လှူဒါန်းပါက ဘာမှ အပြစ်ပြောဖွယ်မရှိ။ အနာထပိဏ်သူဌေးကျောင်း ၅၄ကုဋေ၊ ၀ိသာခါ ပုဗ္ဗာရုံကျောင်း ၂၇ ကုဋေ အကုန်ကျခံ လှူကြတာကို ကြည့်ပါ။ သူ့ အလိုလို လှူဒါန်းတာမျိုး ဘုရားလက်ထက်ကလည်း ခွင့်ပြုပါတယ်။ ဘုရားကိုယ်တော်တိုင် လက်ခံပါတယ်။
ဒါကို ကိုယ်တိုင်ကျောင်းကြီးကြီးထောင်တယ်လို့ မဆိုသာ။ ဒါကြောင့်လည်း ဘုရားရှင်က ကျောင်းနဲ့ ပါတ်သက်လို့ သံဃာဒိသေသ၊ ဆဋ္ဌမမြောက်နဲ့  သတ္တမမြောက်သိက္ခာပုဒ်ကို အထူးပညတ်တော်မူပါတယ်။ ကျောင်းကြီးကြီး ဆောက်လုပ်တဲ့ ရဟန်းများ အလှူခံကြမ်းမှုကြောင့် ရဟန္တာရှင်မြတ်ကြီး အရှင်မဟာကဿပ ဆွမ်းခံကြွတာ တောင် အဲဒီမြို့ ကလူတွေက ထွက်ပြေးကြလေရဲ့ ။ တံခါးကိုလည်းပိတ်ထားကြ။ မျက်နှာလွဲကြ ဖြစ်ပါရောလား။ ရဟန်းမြင်ရင် ထိတ်လန့် တာပေါ့။ လှူရမှာ များလာတာကို။ မြန်မာပြည် အလှူခံလာခြင်း သည်းခံပါ ဆိုင်းဘုတ် တံခါးဝ ရေးဆွဲ ထားသလို မျိုးလိုပေါ့။ ( အကျယ်ကို လူများအဖို့  ဘုရားဥပဒေတော်ကြီး သို့ မဟုတ် ၀ိနယ ပါရာဇိကပါဠိ မြန်မာပြန် ဖတ်ရှုကြလေကုန်။)
ဒီနေရာမှာ ကျောင်းတည်ထောင်ခြင်းသည် ကျောင်းထောင် မဖြစ်ဖို့  သိလိုရင်းပါ။ ကျောင်းထောင်ဆိုတာ ဒီကျောင်းအတွက်နဲ့  ကျောင်းပြီးအောင် ပထမဦးစွာ ကျောင်းထောင်သည့် ရဟန်းကိုယ်တိုင် လူပင်ပန်း စိတ် ပင်ပန်း မယ်၊ နီးစပ်တဲ့ ဒကာ ဒကာမတွေလည်း မနိုင်ဝန်ပေးပြီး ဒကာဒကာမတွေ ပင်ပန်းမယ်ဆိုရင်အဲဒီကျောင်းက ပြီးလျင်ပြီးသွားပေမယ့် ကျောင်းထောင်လို့ ပင် ဆိုရမည်သာ။
ခုတော့ အနယ်နယ်အရပ်ရပ်မှာ ကျောင်းဒကာမရှိပါဘဲ မတန်တဆ ကျောင်းကြီးများလည်း ဆောက်နေကြပါ တယ်။ အသုံးဝင် အသုံးကျတဲ့ ကျောင်းများကို မတန်မဆ မဆိုလိုပါ။ တစ်ချို့  ကျောင်းများမှာ သံဃာက နည်း နည်း၊ ကျောင်းကြီးက ဟီးနေသည်။ တစ်ခါတရံ မှ အသုံးပြုတဲ့ ကျောင်းမျိုးပေါ့။မတန်တဆ အလှူခံခြင်းမျိုးလည်း ပါဝင်တယ်။
ယာ ထောင်မရှိရာ ရဟန်းဘောင်တဲ့။ တစ်ချို့ တောအရပ်တွေ မှာ ဘုန်းကြီး သိပ်ရှားသွားပြီ။ ရှားသွားတာနဲ့ အမျှ ကိုယ့်ဘုန်းကြီး ကိုယ်ရပ်ရွာမှာ တည်မြဲရေး မနည်းကြိုးပမ်းနေကြတယ်။ အချို့ ရွာလေးက ပေါက်စ ဆိုတော့ မြို့ မှာ နေနေကြတဲ့ တောဘုန်းကြီးတွေက တောကို မပြန်ချင်တော့။ ရွာသားတွေရဲ့  ကျောင်းက လေလုံ မိုးလုံ သာသာလေး ရှိတာ ဆိုတော့ စိတ်မ၀င်စား။ ရွာသားတွေကလည်း ကိုယ်တိုင် မလှူနိုင်တဲ့ အခါ။ ဘုန်းကြီး ယာ ဆိုပြီး လုပ်ကိုင်ပေးကြပါလေရော။ ဘုန်းကြီးကိုယ်တိုင် ဘာမှ လုပ်စရာတော့မလိုပါ။ ရွာသားများ အသီးသီး မျိုးစေ့ကျဲချ၊ ရေလောင်းပေါင်းသင်၊ ပြီးသည်အထိ တာဝန်ယူပြီး လိုအပ်ရာရာကို ကျောင်း အတွက်လှူဒါန်းကြ တာပါ။ ဒါမျိုးကို ယာထောင်တယ်လို့  မဆိုသာ။ နာမည်လောက်သာ ဘုန်းကြီးယာ။
ကိုယ်တိုင်ထွန်ခြင်း ပေါင်းသင်ခြင်းမှ အစစအရာရာ လုပ်မည်ဆိုရင်တော့ ဘုန်းကြီး ယာထောင်ခြင်း လို့ သာဆိုရ ပါမယ်။ ယာထောင်သည့် ဘုန်းကြီး ရှိမရှိ ကိုတော့ ကိုယ့်ဖာသာ စုံစမ်းကြပေါ့။
ဒီဆောင်းပါး ရေးဖြစ်တာက ဒီလိုပါ။ ဟိုတစ်လောလေးက အနဂါရိယံ- အိမ်ထောင်မကျရတဲ့ ရဟန်းဘ၀၊ စိတ်ထောင် တော့ မလွတ်သေး။ ရဟန်းဘ၀ဆိုတာ စိတ်ထောင်က လွတ်ဖို့ ပါဘဲ- လို့  ဂျီထော့မှာ မက်ဆေ့ လည်း တင်ထားခဲ့တယ်။ အဲဒီလို တင်ထားတော့ သူငယ်ချင်း တစ်ပါးက ထောင်ဝင်စာ လာတွေ့ တာ ဆိုပြီး နောက်တောက်တောက်ပြောတယ်။ ပြီးတော့ ဒါမျိုးကတော့ ငါလည်း ကျလိုက်ချင်ရဲ့ တဲ့။ သူထင်တာက ဥရောပနေတာ ကို စိတ်မလွတ်လပ် စိတ်ညစ်နေရတယ် ထင်လို့ လေလား၊ သို့ မဟုတ် ဥရောပမှာ နေတော့ ၀င်ငွေတွေ လျှံနေတယ် မြင်မိလို့ လေလား- ကိုယ့်အတွေးပေါ့။ဒီလိုထင်ခဲ့မယ်ဆိုရင် နှစ်ခုစလုံး တစ်ခြားစီပါ။
နောက်ထပ် သူက ပြောသေးတယ် ။ ဘုန်းကြီး လူထွက်တစ်ယောက်ကို ဘုန်းကြီးတစ်ပါးက ပြောတာ။ မင်းနဲ့ ကွာ လူထွက်ရသလားပေါ့။ လူထွက်ကလည်း ပြောလိုက်တယ်။ တပည့်တော်က သာသနာပြုတာဘုရာ။ကိုယ့်ဘာသာ မသက်ဝင်သေး၊ စိတ်မ၀င်စားသေး-တဲ့ သူကို ဘာသာတရားနားလည်အောင် ကိုယ့်ဘာသာ ဖြစ်အောင် လုပ်ပေး တာတဲ့။
အဲဒါနဲ့  ဘုန်းကြီး က အင်း ဒီလို သာသနာတာတော့ ငါဘဲ ပြုလိုက်ချင်ရဲ့ တဲ့။ ကဲ - လုပ်ပေါက်။ ဒကာ လူထွက် ပြောသလိုပဲ သာသနာဆိုတာ သွန်သင်တာပါ။ အမှောင် ကို မီးမောင်းထိုးပြခြင်းလို့ ပြောရပါမယ်။ ကိုယ့်ကို ပြော တဲ့ ရဟန်းက သူ့ ဖာသာ ပြောပြီး၊ သဘောကျရှာလေရဲ့ ။ ကိုယ်က လည်း မျောလိုက်ပြီး ရယ်ခဲ့တာပါပဲ။ မရယ်ချင်ဘဲ ရယ်တော့ ရယ်စရာကြီး။
ကိုယ်ရေးထားတဲ့ အကြောင်းက အိမ်ထောင်မကျပေမယ့် ကိုယ့်စိတ်တွေက ဒိဋ္ဌိအမြင်မှ စပြီး ကျန်တဲ့ လောဘ ဒေါသ မောဟတွေ ဟာ သံတိုင်ရဲ့  အတွင်းမှာ နေကြရတာပါ။ ဒါကို ကျော်လွှားချိုးဖျက်ပြီးရင် လွတ်မှာပါ။ ကိုယ်တိုင်ပဲ လွတ်အောင် ရုန်းကြတာပါပဲလေ။ ဘုရားက နည်းလမ်းသာ ပြတာပါ။
တကယ်လို့ သာ သူ့ ဒီလို ပြန်ပြောလိုက်ရင် စိတ်ဆိုးမလား မသိဘူး ။ အရှင်ဘုရားက နှစ်ကြီးသမား - ပါဘုရား။ ဘာလို့ လဲ ဆိုတော့ သူမေးတာက သံတိုင်အတွင်း စကားတွေပဲလေ။ လွတ်မယ့် စကား မဟုတ်ဘူးလေ။ နှစ်တွေ ရှည် လျားမယ့် စကားပဲ။ တပည့်တော် ခုဟာက နေ့ စဉ်လွတ်ဖို့  လုပ်နေ တယ်လို့  ပြောလိုက်ရင် စကားက သူနဲ့  အ၀င်ဂွင်ကျ ဖြစ်ရင်တော်ရဲ့ ။ ပြန်ဆော်တယ်ဖြစ်နေဦးမယ် စိုးမိသေး။ ခတ်မဆိတ်လေးဘဲ နေခဲ့ရတယ်။ စကားဆိုတာ ဟာလည်း သူတစ်ဖက်သား အကျိုးရှိမှ ကောင်းတာပါ။
ကိုယ်တော်ရေ ပြန်မပြောဘူးနော်။ ပြန်ဆော်တယ်- ဖြစ်မစိုးလို့  လူများ ကြားအောင်ပဲ လူကြားထဲ အော်ထည့်လိုက်တာပါ။မကြားချင်ယောင်ဆောင်နေပါ ဘုရား။
ရှင်းလောက်ပြီနော်။ အိမ်ယာတည်ထောင်ခြင်း မထောင်ခြင်းများ ကိုယ့်သိသမျှ ဖြန့် ဝေပေးခြင်း သက်သက်ပါပဲ။
အမြင်ရှင်းသန့် ပါစေ...
မြတ်ရောင်နီ
(၂၆၊၀၁၊၂၀၁၀)
No comments:
Post a Comment