Pages

Friday, January 29, 2010

ဂျာမဏီမြေပေါ်က ခြေလှမ်းများ- ၉


ဗိုလ်ရှိရင် ဘာမဆို ဖြစ်နိုင်တယ် - တရားတော်
ကဲ ...အားလုံး ကန်တော့ ကြပါစို့  ….
လူများ။ ။သြကာသ၊သြကာသ၊သြကာသ... ရပါလို၏ အရှင်ဘုရား။
ဘုန်းကြီး။ ။ဤသို့  ဘုရား တရား သံဃာ.... မျက်မှောက်ပြုလွယ် ရလွယ်နိုင်ကြပါစေ။
လူများ။ ပေးတဲ့ ဆုနဲ့  ပြည့်ပါစေဘုရား။
ကဲ ၅ ပါးသီလ ယူကြရအောင် ကဲ ဆိုလိုက်ကြ။ အဟံ ဘန္တေ.....
ဒီလို နဲ့  ၅ပါးသီလ ယူအပြီး၊ ပေးအပြီးမှာ တရား ပွဲကို စခဲ့ပါတယ်။
ဒီနေ့  ကိုယ့်လူတွေဆိုတော့ မြန်မာလို ဟောပေးရမယ်။ တရားတော်က ဗိုလ်ရှိရင်ဘာမဆို ဖြစ်နိုင် တယ် တရားတော်။
အေးအေး ဆေးဆေး တိုတို တုတ်တုတ် နာကြတာပေါ့။ နားလည်အောင် ပဲ ပြောပေးမှာပါ။ ဗိုလ် ၅ ပါး ဆိုတာ ရှိတယ်။ လောကကြီးထဲ မှာ နေရင် ဗိုလ် ရှိဖို့ လိုအပ်ပါတယ်။ ဗိုလ်ရှိမှ ဘာမဆိုဖြစ်လာ နိုင်မှာ ပါ။ဒီတရားကို ဒီ မြူးနစ်မြို့ မှာပဲ ဒေသခံ လူတွေကို တစ်နေ့ က ဇန်န၀ါရီ ၁၁ ရက်နေ့ က ဟောခဲ့ ပါ သေး တယ်။ဒါပေမယ့် သူတို့ ကို ၅ပါးစလုံး အပြီး ထိ မဟောရသေးဘူး။ နာမည်လောက်ပဲ သူတို့  ပြောထားပြီး။ ပထမဆုံး ဗိုလ်အကြောင်းကို ရှင်းပြတာ ဟောကြားခဲ့တာ။ တစ်နာရီခွဲလောက်တော့ ကြာတယ်ပေါ့။

ခု ဒီနေ့  ကိုယ် ဒကာဒကာမ တွေကို ၅ပါးစလုံး ဟောပေးပါမယ်။ ကဲ ဘယ်လောက် ဟန်ကျသလဲ တစ်ထိုင်ထဲနဲ့  ၅ပါးစလုံးတောင် နာရမှာ ။တစ်ခါတလေမှာ လူတွေက တရားဆိုတာ တရားထိုင် ရမယ်။ ဘုန်းကြီးတွေနဲ့ ပဲ ဆိုင်သလိုလို။ တရားအားထုတ်မည့် သူနဲ့ မှ ဆိုင်သလိုလို ပြီးတော့ အသက် ကြီး မှ ဆိုင်သလိုလို ထင်တတ်ကြတယ်။ ပြီးတော့ ဘုရားစာ က တရားသမားတွေ အတွက်သာ လောကီရေးရာ အသုံးမ၀င်တော့ ဘူးလိုလို တွေကလည်း ဖြစ်တတ်သေး၊ ထင်တတ်သေးတယ်။
တစ်ချို့ လူငယ်တွေ တရားနဲ့  မိတ်ဆွေ မဖြစ်သူတွေ ပြောတာပါ။ ဒီက တရားနာသူတွေကို မပြောပါဘူး။
[ဟဲဟ၊ဲဟဲဟဲ](အသံ မထွက်ဘဲ ဘုန်းကြီး ကိုယ့်ဖာသာ စိတ်ထဲ သဘောကျနေသည်)။

အဲ -ဗိုလ် ( ၅) ပါး ဆိုတာက ၁။သဒ္ဓါ- ယုံကြည်ချက်။ ၂။ ၀ီရိယ- ကြိုစားမှု ၃။သတိ- သတိရှိမှု ၄။သမာ ဓိ-စိတ်ဝင်စားမှု ၅။ ပညာ- နားလည်သဘောပေါက်မှု၊ အကင်းပါးမှု တို့ ပါဘဲ။ အဲဒါတွေပါပဲဗျာ။

ကိုင်း -နံပါတ် (၁) က သဒ္ဓါ-ယုံကြည်ချက်
ယုံကြည်ချက် ရှိတဲ့သူဟာ လောကီရေးရာ စီပွါးရေး လူမှုရေး မှာလဲ ယုံကြည်ချက်က လိုပါတယ်။ ဒါကို သဒ္ဓါ ခေါ်တာပါ။စာအလိုပေါ့နော။ ပြီးတော့ လောကုတ္တရာနယ်ဘက်က နေပြီး ကြည့်မယ် ဆိုရင်တော့ သဒ္ဓါဆိုတာ ယုံကြည်ရမယ်။ ဘာကို ယုံကြည်ရမလဲ။ ဘုရား တရား သံဃာ ဆိုတဲ့ ရတနာ သုံးပါးနဲ့  ကံ ကံရဲ့  အကျိုး တရားတွေကိုပေါ့။ အင်္ဂုတ္တရနိကာယ် တိက နိပါတ်မှာ ဟောထားတာလည်း

ပြီးတော့ သိသင့်တာ ရှိသေးတယ် ။ သဒ္ဓါ ရှိတဲ့ ပုဂ္ဂိုလ်ဆိုတာ-
ဒဿနကာမော သီလ၀တံ ၊ သဒ္ဓမ္မံ သောတု မိစ္ဆတိ၊
ဝိနယေ မစ္ဆေရမလံ၊ သ ဝေ သဒ္ဓေါ တိ ၀ုစ္စတိ။ တဲ့။အဂုင်္တ္တရနိကာယ်မှာပါ တယ်။
ဆိုလိုတာက ၁။သီလရှိတဲ့ သူတော်ကောင်းများနဲ့  တွေ့ ဆုံခြင်း၊ ဖူးမြင်ရခြင်း၊၂။ ထိုသူတော်ကောင်း တရားများ နာယူမှတ်သားခြင်း။ ၃။ နှမြောတာဘေးဖယ် အလှူတန်းမှာ ရက်ရက်ရောရောပြုလုပ် တဲ့သူကို သဒ္ဓါတရားရှိသူလို့  ခေါ်ပါတယ်။ မြန်မာတွေ ပြောပြောနေတာကတော့သဒ္ဓါတရား ကောင်း တယ် လို့  ပြောကြတာပေါ့။

ယုံကြည်မှုဆိုတာနဲ့  လုံးဝ မျက်စိမှိတ် ယုံရမှာ ကို မဆိုလို ပါဘူး။ ကိုယ်လုပ်တဲ့ဟာကို ကောင်း မကောင်း၊ အပြစ်ရှိ မရှိ၊ အကျိုး ရှိ မရှိ ဖို့ လည်း စိစစ်ဖို့ လည်း လိုတယ်ပေါ့။ မြတ်စွာဘုရားက ကာလာမသုတ်မှာ အဲဒါ အကျယ် ဟောထားတာ ရှိပါတယ်။ ခု တရားတိုတို ဆိုတော့ မှတ်သားထား ရမှာ ယုံကြည်မှုနဲ့ ပါတ်သက်လို့  အကျိုးရှိမရှိ စတာတွေကို သိထားဖို့ ပါဘဲ။

နံပါတ် (၂) က ၀ီရိယ တဲ့။ ကြိုးစားမှုပါ။
ယုံကြည်ရုံသက်သက်နဲ့ ကတော့ ဘာမှ ဖြစ်မလာဘူး။ ဘုရားရှေ့ မှာသွားထိုင်ပြီး တစ်နေကုန် ဆု တောင်း တပည့်တော် ဘော့စ် ဖြစ်ရလိုပါ၏၊ ဘာဘာ ညာညာ တွေ ဆုတောင်းလည်း ပြည့်မှာမဟုတ် ဘူး။ အာညောင်းရုံသာ အဖတ်တင်ပါလိမ့်မယ် ဗျာ။

ဘုရားရှင် ကိုယ်တော်တိုင် ဟောတော်မူ ထားတာပဲ။ ငါက လမ်းပြသူ၊ မင်းတို့ ကိုယ်တိုင် လမ်း လျှောက်ကြ- လို့ ။ ဘုရားရှင်က လမ်းပြရုံသက်သက်ပါ ပြောတဲ့ဟာကို ဘုရားထံ သွားပြီး ဆုတောင်း နေတဲ့သူတွေက ဘုရားကို အားနာဖို့ တောင် ကောင်းတယ်။

ကြိုးစားမှု နဲ့  ပါတ်သတ်လို့  ကတော့ ၁။ စလုပ်ဖြစ်အောင် လုပ်ပါ။ ၂။ ဆက်တိုက် မပြတ်အောင် လုပ်ပါ။ ၃။ အပြီးတိုင် အောင်မြင်သည့်အထိ လုပ်ပါ။ သုံးချက် စုံလျင် အောင်မြင်မယ်။ တစ်ချို့  စတောင် စ မလုပ်ချင်။ ဝေးပြီးပေါ့။ ကိုယ်လိုတာနဲ့  ဘာမှကို ရမှာမဟုတ်ဘူး။သူ့ အတွက် လေထဲ သာ တိုက်ဆောက်ပေတော့။

နောက်လူတစ်မျိုးက စ လုပ်လိုက်သေးတယ်၊ ဆက်မလုပ်တော့ ဘာမှ ဖြစ်မလာ။ နောက်ထပ် လူတစ်မျိုးကျတော့ စလုပ်တယ်၊ ဆက်တိုက်လုပ်တယ်။ ဒါပေမယ့် အောင်မြင်သည့်အထိ မလုပ်ချင် အရာက ကောင်းကောင်းမထင် ရေးရေး လောက်သာ ဖြစ်မှာပါ။

နောက်ဆုံး လူမျိုးကျတော့ တကယ့်ကို အပြီးသတ်ထိ အောင်မြင်ကို ကြိုးစားတယ်။ အဲ ဒီသူ ပဲ အောင်မြင်သွားတာ။ ထိပ်တန်းရောက်သွားတာ။ အောင်မြင်သူတိုင်းကို ကြည့်ပါ။ သာမန်ညောင်ည မဟုတ်တာ သေချာတယ်။

ဒါကြောင့်မို့  နိဒါနသံယုတ်မှာ - န စ ဘိက္ခဝေ ဟီနေန အဂ္ဂဿ ပတ္တိ ဟောတိ၊ အဂ္ဂေန စ
ခေါ ဘိက္ခဝေ အဂ္ဂဿ ပတ္တိ ဟောတိ-တဲ့။ ဆိုလိုတာက-

ခပ်ညံ့ညံ့ ၀ီရိယ နဲ့  အောင်မြင်ကျော်ကြား ထိပ်တန်းရောက် လူအသိမှတ်ပြုခံရတယ် ဆိုတာ မရှိဘူး။ ထိပ်တန်းဝီရိယနဲ့  ကြိုးစားလို့ သာ ထိပ်တန်း အမြင့်ဆုံးမှာ ရှိတာပါ-တဲ့။ ၀ီရိယ အလိုက် စီးပွါးရေး ၊ ပညာရေး ၊ ဘာသာရေး နယ်ပယ် အသီးသီးမှာ လူများ၊ ဘုန်းကြီး များ ကွာခြား သွားကြ တာပါ။ ကဲ ဒါဆို ၀ီရိယလည်း သဘောပေါက်လောက်ပီ။

နံပါတ်(၃)က သတိ-တဲ့။ ဒါ က အင်မတိ အင်မတန် အရေးကြီးပါတယ်။
အမှားတွေ ဒလဟော ဖြစ်နေတာဟာ သတိမရှိလို့ ပါပဲ။ အမှားလုပ်မိတာတောင် ငါ့နှယ် မှားလိုက် တာ၊ ဒီ လောက်ပဲ သိတယ်၊ ဘာကြောင့်မှားမှန်းတောင် မသိလိုက်တဲ့ သတိ။

သတိ က ဒီ ၅မျိုးထဲ မှာ ဗိုလ်ချုပ်ပဲ။ နေရာတကာ သူပါမှ အဆင်ပြေတာ။စီးပွါးလုပ်မယ် ဆိုလည်း သတိလိုတယ်။ သတိထားရတယ်။ သတိထားရမယ်။ သူတို့  ဘာလို့ ကြီးပွါးကြသလဲ၊ ပညာရေး အောင်မြင်တယ် ဆိုရင်လဲ သူက ဘာလို့  ဒီလောက်တော်ရသလဲ။ သတိထားကြည့်ပေါ့။

သတိမရှိ တာဟာ နမော်နမဲ့ နေခြင်းပါပဲ။ နမော်နမဲ့ နေသူဟာ န- တော့တာပါပဲ။ တရား အားထုတ် လို့  ပေါက်မြောက်သူဟာ သတိမေ့လျော့တယ် ဆိုတာ မရှိတော့ပါဘူး။ လုပ်လိုက်တဲ့ အလုပ်တိုင်း
သတိနဲ့ သွား၊ လာ ၊ စား ၊ သောက်နေထိုင်ပါတယ်။

အဲဒီတော့-သတိထား ပြောသူ၊
သတိထားလုပ်သူတွေရဲ့ အပြောတိုင်း အလုပ်တိုင်းဟာ အမှန်တွေ ချည်း ဖြစ်တော့တာပေါ့။ ဘုရား စကားဟာ ဒါကြောင့်မှန်တာ။ အဲဒါကြောင့် မြတ်စွာဘုရားက သတိအမြဲ ရှိဖို့ သတိပေးတာပေါ့။ ဒါလည်း ဒီလောက်ဆို နဲနဲ သဘောပေါက်ရောပေါ့။

နံပါတ် (၄) သမာဓိ- စိတ်ဝင်စားမှု လို့  ပြောကြရအောင်။
အလုပ်လုပ်တဲ့ နေရာမှာ စိတ်ဝင်စားရှိဖို့  လိုပါတယ်။ စိတ်မ၀င်စားတဲ့ အလုပ်က မတွင်ကျယ်ဘူး။ ပျင်းဖို့  ကောင်းတဲ့ အလုပ်ဟာ စိတ်မ၀င် စားတဲ့ အလုပ်ပါပဲ။ စိတ်ဝင်တစား ရှိတဲ့ အလုပ်က ပျော်စရာ လို့ တောင် မြင်လာတယ်။ လူပင်ပန်း ပေမယ့် စိတ်က မပင်ပန်းဘူးပေါ့။


အလုပ်ကို အဲလို စိတ်ဝင်တစားလုပ်တယ်၊ ဇောက်ချ လုပ်တယ် ဆိုတာ သမာဓိ ကို ပြောတာပါ။ ဒီလိုဆိုတော့ ကိုယ့် အလုပ်လေးကို စိတ်ဝင်တစား လုပ်သူတွေ အောင်မြင်တာပါပဲ။ ကိုယ့်အလုပ် မဟုတ်ဘဲ တောင်လုပ် မြောက်လုပ် နေရာတကာ ဟိုစပ်စပ် ဒီစပ်စပ် ဆိုရင် တော့ ဆရာကြီး တစ်ဆူ ဖြစ်ဖို့ တော့ မလွယ်ဘူးပေါ့။

အလုပ်ကို အောင်မြင်သွားသူတိုင်း အလုပ်ကို ဇောက်ချ လုပ်သွားသူချည်းပါပဲ။ စိတ်ဝင်တစား လုပ် သွား သူချည်းပါပဲ။ စာအလိုကတော့ သမာဓိကို ဈာန် လို့ ဖွင့်ပါတယ်။ ဈာန်ဆိုတာကလည်း စိတ်ဝင် တစား စိတ်အလုပ်ကို လုပ်နေခြင်း တစ်မျိုးပါပဲ။ နားလည်သလို ပြောကြည့်တာ။ ဒီလောက်ပဲ ထားတော့။ ဒါ့ထက်ကျယ်သွားရင် မှတ်မိမှာ မဟုတ်ဘူး။

နံပါတ် ( ၅) ပညာ- နားလည် သဘောပေါက်မှု ၊
အကင်းပါးမှု ။ အကွက်မြင်တာတွေ။ ဇယားချတတ်တာတွေ၊ အလိုက်သိတတ်မှုလည်း ပါဝင်မယ်ပေါ့။ ကြီးပွါးတိုးတက်ချင်ရင် အဲဒီ ပညာ ရဲ့ ဖွင့်ဆိုချက်တွေ လိုက်နာဖို့  လိုပါတယ်။


ပတ်ဝန်းကျင်ကြည့်လိုက်ပါ။ အောင်မြင်သူတိုင်း ဒီအချက်တွေကို ပိုင်ပိုင်နိုင်နိုင် အသုံးချ တတ်ပါ တယ်။ စီးပွါးလုပ်တာချင်း ပင်ပန်းချင်းတာ အတူတူတောင်မှ ပညာသမားက သာသွားတယ်။ အလုပ်လုပ် တာကတော့ နေ့ တစ်ဓူဝ အတူတူ လုပ်ကိုင်ကျရတာပါပဲ ။ ပညာတတ်တဲ့ အသိုင်းဝိုင်း လုပ်ရတာနဲ့ ။ ပညာနည်းသူတို့  လုပ်ရတာ တစ်နေကုန်ချင်းတူမယ်။ ငွေဝင်တာချင်းတာ မတူတာ ပညာကြောင့်ပါ။ သူများထက် ခေါင်းတစ်လုံးသာချင်ရင် ပညာရှိအောင် ဖန်တီးရမယ်။

မြတ်စွာဘုရား ဟောတဲ့ပညာဆိုတာကတော့ ဖြစ်ပျက် မြင်တဲ့ ဉာဏ်ပညာကို ဆိုလိုတာပါ။ အဲဒီ ပညာကို ရဖို့  ဆိုရင်တော့ တရား မှတ်ဖို့  လိုတယ်။ တရားဆိုတာ တရားတာ လို့ သဘောပေါက်ပါ။ တရားတာမှန်သမျှ အပြစ်ကင်းတယ်၊ ကိုယ့်အကျိုး သူ များအကျိုးရှိမယ်။ ပညာရှိများ သဘောကျတဲ့ လုပ်ငန်းဖြစ်တယ်။ အဲဒါတရားပဲ။

ဒီထက်မက ဆက်ကြိုးစားဖို့ ကတော့ အာနပါန ၀င်လေ ထွက်လေ လေးကို သိနေဖို့ ပါဘဲ။ နှာသီးဝကို လေ အသွင်း အထုတ်လေးကို စိတ်က လွတ်မထွက်သွားအောင် လုပ်ဖို့ ပါဘဲ။ အစတော့ ဟိုရောက် ဒီရောက် ရောက်မှာပေါ့။ နောက်တော့ မလွတ်တော့ဘူး။ အလေ့ကျင့်ပါဘဲ။ လိုပါတယ်။ နိုင်ငံခြားမှာ ပိုပြီး stress တွေ များတယ်။ အိပ်ရေးကမ၀တော့ စိတ်ကတိုလွယ်။ စိတ်ကလည်း မကြည်လင်နဲ့  ဖြစ်ကြတာပါ။အဲဒါတွေ မရှိအောင်ကတော့ ကူညီနိုင်မည့်သူက တရားပဲ ရှိတယ်။ ကဲ စမ်းကြည့်ပါ။ စပ်မိလို့  ပြောတာပါ။ တကယ့်ကို လိုမှန်းသိလို့ ပြောတာပါ။

ဘုရားဖြစ်တော်မူတယ် ဆိုတာ တကယ်တမ်း ပညာ ရသွားတာ။ အဆင့်အမြင့်ဆုံး ပညာပေါ့။ ဒါကို သဗ္ဗညုတဉာဏ်လို့  ခေါ်ပါတယ်။ ဉာဏ်နဲ့ ပညာ က အတူတူပါပဲ။ဘုရားရှင် ၄၅ ၀ါပတ်လုံး လူနတ် ဗြဟ္မာ သတ္တ၀ါ အပေါင်း အတွက် အကျိုးရှိအောင် လုပ်သွားနိုင်တာလည်း ဒီပညာပါပဲ။

ပညာ ဆိုတဲ့ နေရာမှာသာမန်သိတဲ့ အသိ တောင် အကျိုးရှိမယ်ဆိုရင် သူများထက်သာတယ် ဆိုရင် ထိုးထွင်း ဖေါက်မြင်တဲ့ အမှန်တိုင်းအသိကတော့ ဘာပြောဖွယ် အထူးလိုမှာလဲ။ သေချာပေါက် အဆ ပေါင်းများ စွာ အကျိုးရှိမှာပါ။ မြေကြီးလက်ခတ်မလွဲပါ။ ကဲ ဒါပညာ လို့ ခေါ်တယ်ဗျား။

ကိုင်း- ငါးပါးလည်း စေ့သွားပြီ။ ဒီငါးပါးသာ ရှိလိုက်စမ်း ပါ။ တကယ့်ကို လောကီ ရေးမှာ ဖြစ်ချင်တာ ဘာမဆို ဖြစ်နိုင်သလို၊ လောကုတ္တရာ ရေးမှာလည်း ဘာမဆို ဖြစ်နိုင်ပါတယ်။

ကဲ တရားသိမ်းကြမယ်။ဆွမ်းစားဖို့ အချိန်လည်းနီးပြီ။ ဤသို့  ဗိုလ် ရှိရင် ဘာမဆို ဖြစ်နိုင်တယ် ဆိုတဲ့
ဗိုလ် (၅) ပါး တရားတော်ကို နာယူပြီးလျှင် မိမိတို့  သန္တာန်ဝယ် ကိုယ်စီကိုယ်ငှ ဗိုလ်တရားများ ရှိအောင်ကြိုးစားနိုင်ကြပါစေကုန်သတည်း။ ကြိုးစားနိုင်ကြပြီးလျှင် မိမိတို့  လိုလားတောင့်တ ထားကြ သည့် အတိုင်း ကိုယ်စီကိုယ်ငှ ပြည့်ဝစေသော ဟူ၍ ပတ္ထနာ အောင်ဆု ပြုလိုက်ကုန်ရာ သတည်း။
သာဓု သာဓု သာဓု

ကဲ ရေစက်ချကြရအောင်...ရေစက်ခွက်ကိုင်ထား၊ လိုက်ဆို ..
အရှင်ဘုရား တပည့်တော်တို့ သည်..... သတည်း။

အမျှ ပေးဝေ လိုက်ကြရအောင်...
အမျှ အမျှ အမျှ ယူတော်မူကြပါ ကုန်လော...(၃)ကြိမ်

သာဓု သာဓု သာဓု(၃)ကြိမ်
အမျှပေးဝေပြီးနောက် သာဓု (၉)ကြိမ် ခေါ် ပြီး တရားဟောမှု ဆိုင်ရာပြီးသွားတယ်။ အဲဒီနောက် ဆွမ်းဘုဉ်း ခဲ့ပါတော့တယ်။

မှတ်ချက်။ ။မြူးနစ်မြို့ ၊ မြန်မာမိသားစုများအား(၂၄၊ ၀၁၊ ၂၀၁၀) နေ့ က နေ့ ဆွမ်း အနုမောဒနာကို
ပြန်လည် တင်ပြခြင်းဖြစ်ပါတယ်။ ဟောတုန်းက ပါဠိများ မရွတ်ခဲ့ပါ။ ခုထည့်လိုက်ခြင်းမှာ မှတ်သား လိုသော ဓမ္မမိတ်ဆွေတို့ ကို ကျမ်းလာအတိုင်း သိရှိစေဖို့  ရည်ရွယ်ကာ ထည့်လိုက်တာပါ။ အဓိပ္ပါယ် ကိုသာ ကိုယ်ဒကာဒကာမ များ နားလည်ဖို့  လိုရင်းဟောလိုက်ပါတယ်။ ဟောရာမှာလည်း ရင်းရင်း နီးနီး စကားပြောဟန်နဲ့ ဘဲ ပြောပါတယ်။ နားမလည်ရင် မေးဖို့ လည်း စကားလမ်း ဖွင့်ပေးထားတယ်။ နာတဲ့သူတွေကလည်း မျက်စိပိတ်ထားတာ မဟုတ်သလို ဟောတဲ့သူကလည်း မျက်စိဖွင့် လျက်သာ ဟောပါတယ်။ နားလည်တယ် ထင်မှ ရှေ့ ဆက်သွားတာပါ။ အတော်အဆင်ပြေတယ်။ နာတဲ့သူရော ဟောတဲ့သူပါ လွတ်လွတ်လပ်လပ်ပါဘဲ။ သူတို့ ကလည်း သဘောပေါက်ကြောင်းပြောတော့ ဟောတဲ့သူကလည်း ကျေနပ်ရပြီပေါ့။



မြတ်ရောင်နီ
(၂၉၊၀၁၊၂၀၁၀)





1 comment:

  1. နံနက်ခင်းတိုင်း တပ်ထွက်မိန့်ခွန်းပေးရချေ၏။
    “ရဲဘော်တို့ ရှည်ရှည်ဝေးဝေးမပြောတော့ဘူး။
    အနီးကပ်ဆုံးရန်သူကို ရှာတိုက်ကြ”
    ဟောဗျာ၊
    သဒ္ဓါဗိုလ်ကား တွန့်ဆုတ်တွန့်ဆုတ်၊
    ၀ီရိယဗိုလ်ကား အိပ်ငိုက်လျက်။
    သမာဓိဗိုလ်ကား ဟိုဟိုသည်သည်ငေး၏။
    ပညာဗိုလ်ကား ခေါင်းကိုကုတ်ကာ ထုံအအဖြင့်၊
    သတိဗိုလ်ကား နောက်ဆုံးမှ ရောက်လာသည်။
    ဤသို့ဖြင့် လောကီနယ်နှင့် သံသရာစစ်မြေပြင်ဝယ် ဘယ်နှယ်တိုက်ပွဲဝင်ရပါ့။
    ဇာမဏီတွင် ရောင်နီစခန်းဖွင့်ကာ ကမ့်သွင်းလေ့ကျင့်ပေးတောမူပါဘုရား။
    အလေးဝါဖြင့်(အလေးနီလည်းမဟုတ်၊ လေးဖြူးလည်းမဟုတ်ချေ)

    ReplyDelete